කුරුටු ගීයක්!

අහම්බෙන් මුණ ගැහුණා, ඔහුට ලස්සන කොළයක් අන්සතු... නොසිතමින් දුර දිග ඇන්දා ඔහු සිතුවම් කොළය මත සිතු සිතූ ලෙස...

කොළය සිතුවා, ඔහුගේ සිතුවම් ආදරණීය බව… ඉන්පසු කොළයට උවමනා උනේ කොහේ හෝ තැනක රැඳී සිටීමට ඔහුගේ ජීවිතයේ කාටවත් නොපෙනී... ඔහු මෙතෙක් ඇඳ තිබූ සිතුවමට ද බාධාවක් නොවී... කොළය කිසිසේත් පැතුවෙ නැහැ රාමුකල සිතුවමක් වී ඔහුගේ ජීවිතයේ රැඳී සිටීමට... ඒ කොළය දන්නා නිසා එයට කිසිසේත්ම ඉඩ නැති බව...

ටිකෙන් ටික කාලය ගෙවෙද්දී ඔහුට දැනුනා කොළයෙන් තම ජීවිතයට පලක් නොවන බව... කිසිවක් නොපවසමින් ඔහු ඇද දැමුවා, තමා විසින්ම සිත්තම් කල කොළය කුණු බාල්දියට... කොළය බැගෑපත් උනා... එහෙත් ඔහුට කොළය කොළයක්ම පමණයි... කොළය දැන් පාවිච්චි කල කොළයක් පමණක් නිසා කොළයේ කැමැත්ත අකමැත්ත නොවටිනා දෙයක්ම පමණයි... කොළය නිහඬව බලා ඉන්නව සිදු උන දේ කුමක්ද යන්න තේරුම් ගත් නොහැකිව... ඒ හැර කොළයක් වෙන මොනවා කරන්න ද…

අනේ ඔහු මොහොතකට සිතුවා නම් මේ කොළයක් නොව හදවතක් ඇති මිනිස් දුවක බව...

(Image: http://st.depositphotos.com/1710964/2367/v/950/depositphotos_23674147-Scrapbook-retro-design-with-grunge-paper-background-dried-flower-rose-vintage-wallpaper-pattern-sketch-frame-old-ticket-with-text-Love-Story.jpg)